Оростой шатдаг хий ний­лүү­лэлтийн хэлэлцээр хийх­дээ эрх мэдлээ хэтрүүлсэн гэ­дэг шалтгаанаар Украйны Ерөн­­хий сайд асан Тимощенко до­лоон жил хоригдох ял авсан. Ев­ропын холбооны эрх баригчид Тимощенког суллахаар янз бүрийн арга чарга хэрэглэж байна.  
Тухайлбал, Германы Гадаад хэргийн сайд Украйнд айлчлах үедээ тус улсын Европын холбоонд нэгдэх асуудал нь Тимощенког суллах эсэхтэй шууд холбоотой гэж мэдэгдсэн. Гэвч одоогийн Ерөнхийлөгч Януковичийн хувьд Тимощенког суллана гэдэг өө­рийнхөө улс төрийн ирээдүйг баллаж байгаатай адил үйлдэл болох юм. Учир нь удахгүй болох Ерөнхийлөгчийн сонгуулиар Януко­вич­тэй бодит өрсөлдөх чадвартай цорын ганц хүн нь Тимощенко. Ингэтэл экс Ерөнхий сайдыг үзэж байгаа Герман эмч нар түүнд яаралтай хагалгаа хийхгүй бол тахир дутуу болж магадгүй гэсэн мэдэгдэл хийсэн нь байдлыг маш ээдрээтэй болгож орхилоо. Хагалгааг мэдээж Германд хийх ёстой гэсэн аж. Хэрэв экс Ерөнхий сайд Ук­рай­наас нэг л гарвал улс төрийн орог­нол хүсээд улс төрийн эр­чим­тэй үйл ажиллагаа явуулж, улмаар Януковичийг суудлаас нь огцруулахад тулж магадгүй нь гарцаагүй. Украйны эрх баригчдын томилсон эмч нар нь Тимощенкод хагалгаа хийгээд байхаар өвчин эмгэг байхгүй гэж Германы эмч нартай ихээхэн шөргөөцөлдөж байгаа билээ.