АНУ-ын Ерөнхийлөгч Б.Обама Өмнөд Африкт албан ёсны айлчлал хийхээр хүрэлцэн ирээд байгаа ч тус үндэстний бараг шүтээн нь болсон Н.Манделаг эргэж очихгүй бололтой.  Нас дээр гарсан Н.Манделагийн олон жилийн тэртээд шоронд хоригдож байхдаа олсон уушигны өвчин нь өдгөө дахин сэдэрч, биеийн байдал нь маш муу байгаа. Нөхцөл байдал сайнгүй байгаа учраас Б.Обама эмнэлэгт ирсний хэрэггүй байх гэж Н.Манделагийн гэр бүлийнхэн өөрсдөө хүссэн байна. Б.Обама ч эмнэлэгт очиж, зургаа авахуулах нь чухал биш  гэж мэдэгджээ. Хоёулаа улсынхаа анхны хар арьст Ерөнхийлөгч, Нобелийн энхтайвны шагналтай гээд ижил төстэй зүйл ихтэй Б.Обама, Н.Мандела нар 2005 онд Обамаг сенатор байх үед уулзаж байсан юм. Домогт Ерөнхийлөгч Н.Мандела Б.Обамагийн гэр бүлд элэгсгээр ханддаг бөгөөд өнгөрсөн онд тэргүүн хатагтай Мишель Обама хоёр охиныхоо хамт түүний гэрт зочилж байсан юм.  
Б.Обама Н.Манделатай уулзаж чадахгүй ч түүний 27 жил хоригдож байсан Роббен аралд зочилж, Кейп Тауны их сургуульд үг хэлэх юм байна.

Өмнөд Африкчууд Н.Манделаг урт удаан наслаасай хэмээн залбирч байна.