Орост ажиллаж байгаа хуучин Зөвлөлтийн Бүгд найрамдах улсуудын хөдөл­мөрийн цагаачид энэ жил ар гэр рүүгээ 18,2 тэрбум ам.доллар явуулсан нь түүхэн дээд амжилт тогтоожээ.
Гадаадын цагаачдынхаа тоогоор манай хойд хөрш Америкийн дараа дэлхийд хоёрдугаар бичигддэг. Орост ажиллаж байгаа хүмүүсийн дийлэнх нь хуучин Зөвлөлтийн бүрэлдэхүүнд багтаж байсан улсуудын иргэд. Тэдний Орост цалин хэлбэрээр олж нутаг руугаа явуулсан мөнгөний хэмжээ нь ОХУ-ын ДНБ-ий 0,93 хувь болжээ. Харин энэ мөнгийг хүлээн авч байгаа улсуудын хувьд эдийн засагт нь асар  их нэмэр болдог. Тухайлбал, орост “халтуур” хийж байгаа цагаачдын явуулсан мөнгө Тажикийн ДНБ-ий 50, Киргизийн ДНБ-ий 30, Молдавын ДНБ-ий 15 хувийг бүрдүүлдэг.
Явуулдаг мөнгөний хэмжээ нь Оросын эдийн засгийн үзүүлэлт сайн жилүүдэд огцом нэмэгдээд, өсөлт удаашрах үед эрс багасдаг. Учир нь хөдөлмөрийн цагаачдын дийлэнх нь барилга гэх мэт цалин багатай салбаруудад ажилладаг аж.
Харин гадаадад ажилладаг оросуудын нутаг руугаа явуулдаг мөнгөний хэмжээ жилд дунджаар ОХУ-ын ДНБ-ий 0,17 хувь буюу 3,29 тэрбум ам.доллар байдаг. Тэгээд ч Орос дахь ажилгүйдлийн төвшин хэзээ ч байгаагүй доогуур байгаа аж.