Монгол Улсын Ерөнхийлөгчид нэр дэвшигчийн рейтингийг зарлах хуулийн хугацаа өчигдөр дуусч байгаатай холбогдуулан МАХН-аас нэр дэвшигчийнхээ рейтингийн судалгааны дүнг танилцууллаа. МАХН-аас нэр дэвшиж байгаа Н.Удвалын хувьд хүн амын дийлэнх хувийг эзлээд буй эмэгтэйчүүдийн дэмжлэгийг нэлээдгүй аваад байгаа судалгаа гарчээ. Энэ талаар МАХН-ын Гүйцэтгэх товчооны гишүүн Ч.Улаан “Нэр дэвшигч маань өнөөдөр Ховд аймагт ажиллаад нийслэлд ирнэ. Бүх аймгуудад очиж ажилласан бөгөөд үлдсэн хугацаанд нийслэлийнхээ иргэдтэй уулзана. Ерөнхийлөгчийн сонгуульд анх удаа эмэгтэй хүн нэр дэвшиж байгаагаараа онцлогтой. Сонгуулийн сурталчилгаа эхэлсэн өдрөөс хойш Н.Удвалын рейтинг өсч сүүлийн судалгаагаар 27 хувьтай гарсан. Сонгуулийн сурталчилгаа дуусахад цөөхөн хоног үлдээд байгаа ч нэр дэвшигчийн рейтинг энэ эрчээрээ өснө гэдэгт итгэлтэй байна. Учир нь төр ганхахад хатан ухаант бүсгүйчүүд түшиж тогтворжуулдагийн адилаар ард түмэн ч эмэгтэй төрийн тэргүүнд итгэл хүлээлгэн саналаа өгөхөө бидэнд илэрхийлсээр байгаа” гэв.Нэр дэвшигч Н.Удвалын мөрийн хөтөлбөр, орон нутгийн иргэдтэй хийж буй уулзалтууд, сонгуулийн ажлын талаар гадаадын хэвлэл мэдээллийн хэрэгслүүд мэдээлж, хамтран ажиллах санал тавиад байгаа аж. Тухайлбал, Ройтерс агентлаг, Катарын Аль жазера телевизээс санал тавьжээ.