Монгол Улсын Ерөнхийлөгчийн сонгуульд Ардчилсан намаас нэр дэвшигч Цахиагийн Элбэгдорж өнөөдөр өглөө СБД-ийн 16-р хорооны Бэлхийн хоёрын 12 тоотын оршин суугч Ч.Эрдэнэчулуун гуайнд зочилж өглөөний цайгаа уулаа. Ц.Эрдэнэчулууны гэр бүл Монгол Улсын Ерөнхийлөгч Ц.Элбэгдоржийн мод тарих зарлигийг дэмжиж хороо, дүүрэгтэй үлгэр жишээд тооцогдох ногоон төгөлтэй болсон юм билээ. Өөрсдийн гараар тордож, арчилсан ногоон төглөө төрийн тэргүүндээ танилцуулах гэж түүнийг өглөөний цайнд урьжээ. Ч.Эрдэнэчулуун гуайн хашаан дахь ногоон төгөлдөө долоон жилийн турш  20 гаруй төрлийн мод, 300 орчим мод, бут, сөөг тарьжээ.  Мөн тахиа, галуу, цацагт хяруул зэрэг амьтан тэжээдэг шаггүй ажилсаг, чамбаа айл гэдэг нь харваас илт. Өөдлөх айл үүднээсээ гэдэг шиг хүний гараар бүтсэн ногоон төгөл Бэлх орчмыг чимж байсан юм.  
Ц.Эрдэнэчулуун гуай төрийн тэргүүнтэй цайлах зуураа “Ерөнхийлөгчийн мөрийн хөтөлбөрт олон сайхан санал санаачилга, бодлого байгааг онцлох ёстой. Энэ дотроос байгаль орчинд ээлтэй ногоон хөгжлийг дэмжигч байна гэсэн таны бодлогыг маш их дэмжиж байна. Гэр хорооллын оршин суугч бидэнд цэвэр цэмцгэр, ногоон бүсэд амьдрах боломж байна. Харин төрийн зүгээс эрчим хүчний асуудлыг шийдэх ялангуяа гэр хорооллыг сэргээгдэх эрчим хүчээр хангах асуудал юу юунаас чухал байгаа” гээд дэд бүтцийн асуудлыг төр шийдээд өгөх юм бол монгол хүн бүр бүтээгч байж чадна гэж байсан.  

Энэ үеэр Бэлхийн иргэд Монгол Улсын Ерөнхийлөгчийг хөршид нь зочилсон сургаар хүрэлцэн ирж, Ерөнхийлөгчийн мөрийн хөтөлбөртэй холбоотой зарим зүйлийг тодруулж, сонирхсон асуулт бүрийнхээ хариуг авч чадсандаа их л олзуурхаж байлаа. Хөрш эмээ, өвөө нарын хувьд төрийн тэргүүнээс ойрын өдрүүдэд болж буй авлигын хэргээс эхлээд түүний ирээдүйд хийж хэрэгжүүлэх ажлыг ихэд шимтэн асууж, өөрсдийнхөө санаа бодлыг ч чөлөөтэй илэрхийлж байсан.
Ерөнхийлөгч Ц.Элбэгдоржийн сонгуулийн мөрийн хөтөлбөрт гэр цэцэрлэг, залуу ээжүүдийг дэмжих бодлого, ахмад настны ажлын байр зэрэг иргэдийн өдөр тутмын амьдралд тулгамдаж байдаг асуудлуудын гарцыг олсон олон бодлого багтсан байгаад тэд баяртай байгаагаа илэрхийлсэн. Ерөнхийлөгчийн хувьд мөрийн хөтөлбөрөө хэрхэн хэрэгжүүлэх талаар дэлгэрэнгүй тайлбарлав. Улс орны нийтлэг  эрх ашиг, нийгэм эдийн засгийн үр дүнтэй бодлого, дэлхий дэх Монголын сайн нэрийн талаар хөршүүд Ерөнхийлөгчтэйгээ ярилцлаа.
Ц.Эрдэнэчулуун гуайн хорооны Бэлхийн иргэд Монгол Улсын Ерөнхийлөгчийн өнгөрсөн дөрвөн жилд хийж хэрэгжүүлсэн ажлууд бодитой үр дүнд хүрч байгаад сэтгэл хангалуун байгаагаа илэрхийлээд цаашид шударга ёсыг тогтоох, шүүхийн шинэтгэлийг илүү эрчимжүүлэх, иргэддээ эрхийг нь илүү өгөх, шууд ардчиллыг илүү хөгжүүлэх зэрэг олон ажилд амжилт гарган санасан зорьсон зүйлээ илүү эрчтэйгээр хийхийг хүслээ.