Туркийн цагдаа нар Канадын “CBC” телекомпанийн хоёр сэтгүүлчийг Стамбулд болж байгаа эсэргүүцлийн арга хэмжээний үеэр саатуулсан байна. Сэтгүүлч Саса Петричич , Дерек Стоффел нар одоо Стамбулын цагдаагийн нэг хэсэгт байна гэж телекомпанийн удирдлага мэдээлсэн байна.
Стоффел Твиттертээ “Бид цагдаагийн газарт байж байна. Сэтгэл санаагаар дэмжиж байгаад талархаж байна” гэж бичжээ.
Ерөнхий сайдыгаа дагалдан Европт айлчилж яваа Канадын Гадаад хэргийн сайд Жон Бэрд улсынх нь иргэдийг баривчилсанд эмзэглэж байгаагаа илэрхийлсэн байна. Тэрээр Лондонгоос Оттава дахь Туркийн элчин сайд Тансей Бабали руу утасдаж тайлбар өгөхийг шаарджээ. Бабали хариуд нь Стамбулын албаны хүмүүстэй утсаар ярьж сэтгүүлчдийг суллахыг хүссэн гэнэ.