УИХ-ын чуулганы хуралдаанд Гадаад харилцааны сайд Л.Болд, “Монгол Улсын Элчин сайдын яам, Ерөнхий консулын газар, Консулын газрыг гадаадын зарим улсад нээн ажиллуулах тухай” Улсын Их Хурлын тогтоолын төслийг танилцуулж, гишүүдээс хэлэлцүүллээ.
Энэ асуудалд цөөнхийн бүлгийн гишүүд тун шүүмжлэлтэй хандсан юм. Тухайлбал, УИХ-ын гишүүн М.Энхболд, “Намайг Ерөнхий сайд байх хугацаанд хоёрхон газар л элчин сайдын яам нээсэн. Гэтэл энэ засгийн газар байгуулагдаад жил болоогүй байхад Л.Болд сайд долоон газар элчин сайдын яам байгуулахаар оруулж ирж байгаа нь хэтэрхий түргэдсэн байна. Тиймээс дэмжих боломжгүй” гэв. Мөн УИХ-ын гишүүн Ц.Нямдорж, “Олон элчин сайдын яам байгуулах төсөв мөнгө хангалтгүй байхад ийм байж болохгүй” гэсэн байр суурийг илэрхийлсэн.
Харин УИХ-ын гишүүн Л.Цог, О.Баасанхүү, Д.Ганбат нар Монгол Улсын гадаад харилцаа, эдийн засаг хөгжиж байгаа энэ үед элчин сайдын яам байгуулах нь зөв гэсэн байр суурь илэрхийллээ. Ингээд санал хураах үед УИХ-ын дарга З.Энхболд долоон газар элчин сайдыг яамыг зэрэг байгуулах гээд байгаа юм биш. Дэс дараатай байгуулна гэж хэлснээр олонхи дэмжсэн юм.