Захиргааны хэргийн давж заалдах шатны шүүх уржигдар М.Бадамсүрэнгийн нэхэмжлэлтэй Ерөнхий сайд Н.Алтанхуягт холбогдох хэр­гийг хэлэлцжээ. М.Бадамсүрэн “Ерөнхий сайд намайг Дорнод аймгийн Засаг даргаар томилоогүй нь хууль зөрчсөн үйлдэл болсон” хэмээн шүүхэд хандсан. Анхан шатны шүүх түүний нэхэмжлэлийг хэлэлцээд Ерөнхий сайд Н.Алтанхуяг М.Бадамсүрэнг Засаг даргаар томилоогүй нь хуульд нийцсэн байна гэсэн шийдвэр гаргажээ.
Тэрээр эл шийдвэрийг хүлээн зөвшөөрөхгүй Захиргааны хэргийн давж заалдах шатны шүүхэд хандсан боловч тус шүүх анхан шатны шүүхийн шийдвэрийг хэвээр үлдээв. Мөн М.Бадамсүрэн Монгол Улсын засаг захиргаа, нутаг дэвсгэрийн нэгж, түүний удирдлагын тухай хуульд заасан Засаг даргад тавих шаардлагыг хангаагүй байна гэж дүгнэжээ. Энэ мэт зарга үргэлжилж байгаа учраас Дорнод аймаг өнөөдрийг хүртэл Засаг даргагүй хэвээр байна.