Хятадын кибер гэмт хэрэгтнүүд АНУ-ын зэвсэгт хүчний агаараас эсэргүүцэн хамгаалах системийн 20 орчим сайтад халдлаа гэж Америкийн хэвлэлүүд мэдээлснийг “Ройтер” агентлаг дамжууллаа. Хакерууд зөвхөн АНУ-ын зэвсэгт хүчинд ашиглаж байгаа төдийгүй, Европын орнууд, Ази, Персийн булангийн орнуудын армид байгаа орчин үеийн цэргийн нисэх онгоц, хөлөг, агаараас эсэргүүцэн хамгаалах системийн талаарх мэдээллийг авч тараасан байж магадгүй байна. Яг хэчнээн удаа нэвтэрч хэдий материал авсныг тогтоогоогүй аж.
Австралийн хэвлэлүүд бас Хятадын зүгээс хакерууд сүүлийн өдрүүдэд австралийн тусгай алба, Батлан хамгаалах яамны мэдээлэл рүү нэвтэрч байгааг мэдээлсэн байна. Тэд Австралийн тагнуулын байгууллагын шинэ албан байрны зураг, гадаад яамны албан тушаалтнуудын жагсаалт зэргийг хулгайлсан гэжээ.
Харин хакерын энэ довтолгооноос болоод Бээжин, Камберра хоёрын харилцаа муудахгүй гэж Австралийн Гадаад хэргийн сайд Боб Карр даваа гарагт  мэдэгджээ.