Багануур дүүргийн худалдаа үйлчилгээний цэг салбаруудад “Тамхины хяналтын тухай” хууль хэрхэн хэрэгжиж буйг хянах зорилгоор сургуулиас 500 метр доторх байршилд худалдаа үйлчилгээ эрхлэн явуулж байгаа дэлгүүр, ТҮЦ-д шалгалт хийжээ. Тамхи худалдаалах эрхгүй дэлгүүрүүд тамхи худалдаалж байна гэсэн иргэдийн мэдээллийн дугаа шалгаж, дэлгүүрүүдийн лангуун доор тамхи хадгалагдаж байгаа эсэхийг шалгасан байна. Шалгалтанд худалдаа үйлчилгээний 16 цэг салбар хамрагдсанаас гурван цэгт “Тамхины хяналтын тухай” хуулийг хэрэгжүүлээгүй нь нотлогджээ. Тухайлбал, 5-р хорооны Залуусын задгайд байршилтай З.Нарангаля захиралтай “Найман наран” ХХК-ний хүнсний дэлгүүрээс 69 хайрцаг тамхи, 3-р хорооны 30-р байрны 01 тоотод байршилтай н.Ганболд эзэнтэй “Зэгэстэй” хүнсний мухлагаас 42 хайрцаг тамхийг дүүргийн мэргэжлийн хяналтын хэлтсийн байцаагч хураан авчээ. Үүнээс гадна н.Авирмэд эзэнтэй “Марал” хүнсний дэлгүүрт тамхи нууцаар худалдаалан хууль зөрчиж буй тухай иргэдийн мэдээлэл, гомдол ЗДТГ-т ирсэн боловч шалгалтаар зөрчил илрээгүй байна. Мөн 3-р хорооны  38-р байрны 01 тоотод байршилтай н.Хишигжаргал эзэнтэй “Төгөлдөр” хүнсний мухлаг нь тамхи худалдаалж хууль зөрчиж буйг иргэд бичлэг хийж фейсбүүк хуудсандаа нийтэлсэн байна.