Маргааш олон улс даяар алга болсон хүүхдүүдийн дурсгалыг хүндэтгэх өдрийг тэмдэглэнэ. Энэ өдрийг онцлон тэмдэглэх санаачилгыг АНУ-ын Ерөнхийлөгч Рональд Рейган одоогоос 30 жилийн өмнө гаргасан юм. Жил бүрийн тавдугаар сарын 25-ныг онцлон сураггүй болсон хүүхдүүдийн дурсгалд зориулсан нь 1972 оны энэ өдөр АНУ-ын Нью-Йорк хотод Этан Патц хэмээх зургаан настай хүү алга болсонтой холбоотой юм. Хичээлдээ явахаар гараад, гэрээсээ хоёрхон гудамжны зайд сураггүй алга болсон Этан хүүгийн учир битүүлэг энэ хэрэг тухайн үедээ ихээхэн шуугиан дэгдээж, олон сая эцэг эхийн зүрхийг шимшрүүлж байжээ. Тухайн үед Этан Патцыг 100 гаруй цагдаа эрэн сурвалжилж хайсан боловч одоо болтол хүүгийн хувь заяа хэрхэснийг тодорхой болгож чадаагүй юм. Түүнийг 2001 онд орон нутгийн засаг захиргаа нас барсанд тооцсон байна. Этан Патцыг асрагчийнх нь найз байсан Хосе Антонио Рамос хөнөөсөн гэж сэжиглэн хорьсон боловч одоо болтол хангалттай нотлох баримт олоогүй. Ор сураггүй алга болсон хүүхдүүдийн хэрэг АНУ-аар зогсохгүй дэлхийн олон улсад гарсаар байгаа. Хамгийн сүүлийн жишээ гэхэд Португалид алга болсон Маделин МакКейн охины хэргийг хэдэн жилийн турш мөрдөөд олж чадаагүй л байна.