Монгол цэргийн сүр жавхаа илэрхийлсэн болсон цэрэг эрсийг энэ сарын 26-нд шалгаруулах гэж байна. Нийслэлийн Засаг дарга Э.Бат-Үүлийн санаачилгаар “Монгол цэргийн жавхаа” уралдааныг өнгөрсөн нэгдүгээр сарын 30-нд зарласан билээ. Уралдаанд 7200 гаруй цэргийн албан хаагч оролцсоноос эхний шалгаруулалтаас шилдэг есөн анги буюу Зэвсэгт хүчний 013, 029, 032, 084, 120, 150, 326 дугаар, дотоодын цэргийн 805, хилийн цэргийн 151 дүгээр анги шалгарсан юм. Тэгвэл шилдгийн шилдгийг тодруулах “Цэргийн ёслолын ажиллагаа” ийнхүү энэ амралтын өдөр Сүхбаатарын талбайд болох гэж байна. Энэ үеэр хоёрдугаар шатанд шалгарсан “Тэргүүний жагсаалч” ангиудын ёслолын жагсаалын үзүүлэх тоглолт болохоос гадна Цэргийн Дуу бүжгийн эрдмийн чуулга, Үлгэр жишээ үлээвэр найрал хөгжмийнхөн ёслолын буудлагатайгаар уран бүтээлээ толилуулж, “Үдшийн нийтийн цэнгүүн” болно гэлээ.
