Умард Солонгосын удирдагчид цэргийн ажиллагааны үед хэрэглэхээр нөөцөлсөн стратегийн нөөцөө задлан хэрэглэж эхэлсэн байна. Ингэж тэд улс орондоо нүүрлээд байгаа өлсгөлөнг давах эцсийн аргаа хэрэглэж байна. Энэ нөөцөөс Хятад Солонгосын хил орчим нутаглаж байгаа айл өрхүүддээ 15 кг эрдэнэ шиш хуваарилж өгчээ. Энэчлэн нийслэл Пеньян болон өөр олон хотод хүнс түгээж байгаа талаар мэдээлж байна.
Тус улсад өлсгөлөн нүүрлэсэн нь бодит зүйл болжээ. Гуравдугаар сарын сүүлчээр гэхэд л умардын бүрэн зэвсэглэсэн 12 цэрэг Хятадын хилд нэвтэрсэн нь баригдсан юм. Тус улс цөмийн хөтөлбөрөө зогсоохгүй байгаагаас хориг арга хэмжээ авч донор орнуудаас нийлүүлэх хүнсний тусламж зогссонтой холбогдоод цэргийн хүнс ч гэсэн татарчээ. Өлсгөлөнгөөс болоод тус улсад хүний мах идэх, үүнийхээ тулд гэр бүлийнхнээ хороох явдал гарах болсныг Өмнөд Солонгосын хэвлэлүүд мэдээлж байна. 2009 онд Хесан мужийн нэгэн эр бага насны охиноо алж идсэнийхээ төлөө цаазлуулсан тохиолдол гарч байсан юм. 2006 онд хоёр ч ийм тохиолдол гарч байсныг мэдээлж байлаа. Ер нь 1990-ээд онд тус улсад нүүрлэсэн өлсгөлөнгийн үеэр хүний махыг хүнсэнд хэрэглэх, худалдаалах явдал бүр түгээмэл болоод байсан юм. Тэр үеийн өлсгөлөнгөөр 250 мянгаас гурван сая хүн амь алдсан гэсэн баримжаа тоо байдаг.
