АНУ-ын Бостон хотод бөмбөг дэлбэлсэн хэрэгт сэжиглэгдэж байгаа Жохар Царнаев шархадчихаад цагдаагаас зугтаж завин дээр нуугдаж байхдаа завины дотор талын ханан дээр цусаараа энэ халдлагыг АНУ-аас Ирак, Афганистаны мусульманчуудын эсрэг явуулж байгаа хатуу бодлогын хариуд  хийсэн гэдгээ бичсэн байжээ. Тэр бичлэгээ “Нэг мусульман хүнд халдана гэдэг бүх мусульманчуудад халдаж байна гэсэн үг” гэж төгсгөсөн байсан гэнэ. Жохар бас  өөрийн ах Тамерланыхаа тухайд тэр аль хэдийнээ эр хүний ёсоор диваажинд очсон, би ч одоо араас нь очно гэсэн байжээ.
Энэ бүх бичлэгээс үзэхэд 19 настай Царнаев хэдийнээ үхэхэд бэлтгэж цагдаагийнхан түүнийг олохгүй гэдэгт итгэж байсан бололтой. Түүнийг шархадчихаад  Бостоны хот орчмын байшингийн арын хашаанд завинд нуугдаж байхад нь дөрөвдүгээр сарын 19-нд олж баривчлан шоронгийн эмнэлэгт хүргэсэн юм. Тэрээр хүзүү хоолойдоо шархадсан байсан бол түүний ах 26 настай Тамерлан цагдаа нартай буудалцаж байхдаа нас барсан юм.
Жохар Царнаевыг гүйлтийн тэмцээний барины газарт хоёр бөмбөг дэлбэлж гурван хүний амь нас хөнөөн 260 орчим хүнийг шархдуулсан хэрэгт буруутгаж байгаа юм.