Белгийн нийслэл Брюсселийн олон улсын нисэх буудлын ачигчид ажил хаяснаас 50 нислэгийн хуваарийг өөрчилж, хэдэн арван нислэг хойшиллоо гэж Европын холбооны агаарын тээврийн хамгийн гол сүлжээний нэг тус буудлын  хэвлэлийн алба мэдээллээ. Ажил хаяад нэг хоног өнгөрч байгаа Swissport буудлын ачигчдын үйлдвэрчний эвлэл  үйлчилгээний ажилчид болон ачигчдын тоог нэмэх шаардлага тавьж байгаа юм байна.
“180 зорчигчтой онгоцны ачааг хоёрхон ачигч хариуцаж байгаа нь хангалтгүй төдийгүй, аюултай байна” гэж үйлдвэрчний эвлэлийн төлөөлөгч Сандра Ланженю мэдэгдсэн байна. Тэрээр даваа гарагт компанийн удирдлагуудтай уулзсан ч тохиролцоонд хүрч чадаагүй учраас ажил хаялтаа дахиад нэг өдөр сунгана гэжээ. Ачигчид ажил хаяснаас буудлын агуулахад 10 мянга гаруй ачаа бараа хуримтлагдаад байгаа бөгөөд энэ бүхэн дуусахаар бүгдийг нь зорчигчдын хаягаар гэрт нь хүргэж өгнө гэж буудлын албан ёсны төлөөлөгч мэдэгдээд байна.