БНАСАУ Мусудан маягийн хоёр ч пуужингаа хөөргөх талбайгаас буулгалаа гэж АНУ-ын засгийн газрын эх сурвалжийг иш татан Рейтер агентлаг дамжууллаа. Эх сурвалжийн мэдээлснээр зүүн эрэгт байрладаг хөөргөх талбайгаас буулгасан пуужингуудыг өөр талбайд аваачиж байгаа юм байна. Нэр, албан тушаалаа хэлэхийг хүсээгүй эх сурвалж юутай ч умардынхан пуужингуудаа байлдааны бэлэн байдлаас буулгасан болохыг нотолсон байна.

Сүүлийн хэдэн долоо хоногийн туршид Умард Солонгос баллистик пуужин хөөргөнө хэмээн өмнөд Солонгос болон Япон, АНУ-д заналхийлж байсан юм. Умардын эрх баригчид өмнөд болон АНУ-г хамтарсан хээрийн сургууль хийснийг нь өөртөө заналхийлж байна гэж үзэн ийм хариу авч байна гэж мэдэгдэж байсан юм.