Монгол Улсын Ерөнхийлөгчийн сонгуулийн тухай хуулийн дагуу гадаадад ажиллаж амьдарч байгаа иргэдийн санал авах ажлыг зохион байгуулах СЕХ, ГХЯ-ны хамтарсан комисс байгуулан ажлиллаж эхэлжээ. Уг комиссоос мэдээлснээр гадаад улс орнуудад амьдарч байгаа монгол иргэдийн саналыг тухайн оронд суугаа Дипломат төлөөлөгчийн газраар дамжуулан зургадугаар сарын 14, 15, 16-ны өдрүүдэд авахаар болсон байна. Иймээс гадаадад ажиллаж амьдарч байгаа, сонгууль өгөх насны иргэдийг Ерөнхийлөгчийн сонгуульд оролцуулах, санал авах ажлыг зохион байгуулах үүрэг бүхий салбар комисс Монгол Улсаас гадаад улсад суугаа Дипломат төлөөлөгчийн нийт 39 газарт байгуулах аж.

Сонгуульд саналаа өгөх хүмүүс иргэний шинэчилсэн бүртгэлд хамрагдсан байх ёстой гэнэ. Мөн Ерөнхийлөгчийн сонгууль болохтой холбогдуулан гадаадад байгаа иргэдийн шинэчилсэн бүртгэлийг үргэлжлүүлж байна. Хэрэв шинэчилсэн бүртгэлд хамрагдаагүй бол гадаадад буй монгол иргэд энэ сарын 5-29-ний хооронд Дипломат төлөөлөгчийн газартаа биечлэн буюу факс, цахим шуудан, утсаар бүртгүүлж, санал өгөх эрхээ баталгаажуулах ёстой.