Изабелла Баррет ердөө л зургаан насандаа өөрийн гоёл чимэглэл, шагнал, үнэт эдлэлээрээ сая долларын хөрөнгөтэй болоод амжжээ. Тэр олон удаагийн гоо сайхны тэмцээн, реалити-шоунд түрүүлсэн байна.

Гэхдээ л тэрээр үеийнхэнтэйгээ хамт гамбургер идэж, мөхөөлдөс долоохоос буцахгүй л дээ.  Тэр “Саятан байх сайхан. Би бол супер од. Надад өөрийн гэсэн бизнес бий, би босс байх дуртай. Би олон удаагийн гоо сайхны тэмцээнд түрүүлсэн. Бас би гоё гуталд дуртай. Надад 60 хос гутал бий” гэж бяцхан мисс ярьж байна.

Уг нь ердөө л хоёр жилийн өмнө түүнийг дөрвөн настай байхад нь ээж нь анхны гоо сайхны тэмцээнд оруулж байжээ. “Тэр үед охин минь учраа ч олохгүй, зүгээр л гялалзсан сайхан хувцас, тансаглалд дурлаж байсан. Яг л усанд хөвж яваа загас шиг. Харин одоо бол өөр, зорилготой болсон” гэж ээж Сюзанна нь ярьж байна.