Баривчлагдаад шархадсаны улмаас эмнэлэгт байгаа Жохар Царнаев ах Тамерлантайгаа хамт Бостон хотод марафон гүйлтийн тэмцээний бариан дээр бөмбөг дэлбэлснээ Холбооны мөрдөх товчооны ажилтнуудад мэдүүлсэн байна. Үүнийг хууль хяналтын байгууллагын эх сурвалжийг үндэслэн “Бостон глоб” сонины электрон хувилбарт нийтэлжээ. Жохар бас ахтайгаа дөрөвдүгээр сарын 19-нд цагдаагийн ажилтныг алснаа ч хүлээжээ. Тамерлан нь цагдаагийнхантай буудалцах үедээ амь алдсан бол Жохар шархдаж баригдсан юм. Тэр хоолойдоо шархадсан учраас ярьж чадахгүй бичгээр мэдүүлэг өгч, асуултын хариуд зөвхөн толгой дохиж байгаа гэнэ. Гэмт үйлдлээ хүлээн зөвшөөрч толгой дохиж байсан тэрээр шүүгчийн “өмгөөлөгчийн хөлс төлөх үү” гэсэн асуултад ганцхан үг “үгүй” гэж шивнэжээ.
Дөрөвдүгээр сарын 15-нд Бостон хотын төвд  болж байсан марафон гүйлтийн тэмцээний барианы газарт 12 секундын зайтай хоёр ч бөмбөг дэлбэрч гурван хүн нас барж, 260 орчим хүн шархадсан юм. Америкийн эрх баригичд энэ хэргийн эзэн нь оросын чечениэс гаралтай ах дүү Царнаев гэж үзэж байгаа юм.