ОХУ-ын Белгород хотод дэлгүүрт гурван хүнийг буудаж алаад гудамжинд бас гурван хүнийг буудсан аймшигт хэрэг гарсан. Таван хүн газар дээрээ нас барсан бол 16 настай нэг охин эмнэлэгт очоод нас барсан байна. Тэр гудамжинд байрладаг их дэлгүүрийн ажилтан Елена Петренко болсон үйл явдлыг харснаа “Бид ажил дээрээ байж байтал гэнэт буун дуу гарсан. Эхлээд бөмбөлөг хагалж байгаа ч юм уу, салют юм уу гэж бодсон. Цонхоор хартал гэгээлэг өнгийн BMW, магадгүй Х5 л байсан байх. Тийшээ нэг залуу гүйж харагдаад гэнэт машинаас буун дуу гарч, нөгөө залуу унасан. Тэргэнцэртэй нэг эмэгтэй хэрэндээ л зугтаагаад дэлгүүр лүү орох гэтэл худалдагч үүдээ хаагаад дотроос нь түгжиж орхисон. Эмч нар дэлгүүрээс дөрвөн ч хүний цогцос гаргаж авч явахыг бид цонхоороо харж байсан” гэжээ. Яг тэр гудамжинд байдаг 9-р лицейн хүүхдүүд хашгиралдан гүйлдэж байсан байна. 
Сэжигтэн Сергей Помазуны аав нь насаараа ой хамгаалагч хийсэн болохоор гэртээ буутай байдаг байж. Хөршүүд нь аавынх нь тухай их л тайван хүн гэж ярьж байна. Харин сэжигтэн Сергейн тухай бол хүүхэд байхдаа их л чимээгүй хүүхэд байсан хожим насанд хүрээд бол ихэнхдээ шоронд байсан даа гэжээ.
Гэмт хэрэгтэн дөрвөн сумтай Иж-27 маркийн хийн гар буу, 40 сумтай хагас автомат “Вепрь-308” карабинтай явсныг цагдаагийнхан барьжээ. 
