Эрүүл мэндийн салбарын эмч, ажилчдыг тойрсон хээл хахууль авлигын хэрэг тасрахгүй байгаа. Иймээс авлигаас урьдчилан сэргийлэх, төрийн байгууллагын үйл ажиллагааг ил тод нээлттэй байлгах ажлыг эрчимжүүлэхийн тулд Эрүүл мэндийн сайдын 2013 оны дөрөвдүгээр сарын 16-ны өдөр “Авлигатай тэмцэх ажлыг эрчимжүүлэх тухай” 125 дугаар тушаал гарсан. Үүнтэй уялдуулан эрүүл мэндийн салбарт сайн засаглалыг нэвтрүүлэхээр Эрүүл мэндийн яамны дотоод аудитын хороо баасан гарагт хуралдлаа. Уг хурлаар эрүүл мэндийн салбарын хөрөнгө оруулалт, төсвийн зарцуулалт болоод тус хорооны үйл ажиллагааны жилийн төлөвлөгөөг авч хэлэлцсэн байна.

Мөн Эрүүл мэндийн сайд Н.Удвал Авлигатай тэмцэх газрын дарга Н.Ганболдод хамтран ажиллах хүсэлт тавин хэлэлцүүлэг хийлээ. Хэлэлцүүлгийн хүрээнд авлигатай тэмцэх чиглэлээр соён гэгээрүүлэх, сургалт явуулах, салбар дотор сургагч багшийг бэлтгэх, эрүүл мэндийн салбарт гарч болзошгүй авлигаас урьдчилан сэргийлэх чиглэлээр хамтран ажиллахаар тогтлоо.