ОХУ-ын Хабаровскийн хязгаарын хүүхэд саатуулах сувиллын газрын 62, 43 настай хоёр сувилагч дөрөвдүгээр сарын 1-ний орой ганц нэг шил юм хуваан ууж хөөрөлдөн суух гэтэл хэд хэдэн хүүхэд сэрээд дуу дуугаа авалцан уйлж өнөө хоёрт саад болж эхэлж. Сувилагчид уурлан гурван настай хүү, 10 сартай охиныг хэрцгийгээр зодож, долоон сартай бяцхан жаалын толгойг нь хөнжлөөр бүтээгээд байшингийн буланд тавьчихсан байна.   Өглөө нь асрах газрын бусад ажилчид ирээд хүүхдүүдийг үзэхэд энд тэндээ хөхөрчихсөн, уйлсаар хоолой нь сөөж орхисон байжээ. Долоон сартай бяцхан хүү комд орсон бол нөгөө хоёрт нь эмнэлгийн тусламж шаардлагатай болж. Хоёр сувилагчид эрүүгийн хэрэг үүсгэн шалгаж эхэлсэн байна.