Энэ жил Хятадын коллеж, их дээд сургууль төгсөгчид ажил олохтой холбоотой ихээхэн асуудалтай тулгарч магадгүй байгаа тухай Хятадын боловсролын яам мэдээлжээ. Нэг талаас өнгөрсөн жил Хятадын эдийн засгийн өсөлт удааширч үйлдвэрлэл хумигдсан, нөгөө талаас энэ жилийн төгсөгчдийн тоо дээд амжилт тогтоогоод байгаа юм. Энэ жил 6,9 сая хүн сургуулиа дүүргэн ажлын эрэлд гарах нь өнгөрсөн жилийнхээс 190 мянгаар их байгаа аж. Ийм байтал тэд нэлээд хумигдсан хөдөлмөрийн зах зээл дээр өрсөлдөх шаардлагатай болох юм. Боловсролын яамнаас гаргасан мэдээнээс үзвэл  эдийн засгийн өсөлт удааширснаас болж 500 гаруй компани орон тоогоо 15 хувиар цомхотгох төлөвлөгөөтэй байгаагаа зарласан нь шинээр төгсөгчдийг ажлын байраар хангахад сайнаар нөлөөлөхгүй нь мэдээж. Өнөөдрийн байдлаар аялал жуулчлал, цахим үйлчилгээ, анагаах ухааны салбаруудад л ажлын хүчний шаардлага бага хэмжээгээр нэмэгдсэн. Харин машин үйлдвэрлэл, уул уурхай, ашигт малталын олборлолт, барилгын салбарын ажлын хүчний эрэлт буурч байгаа юм байна.