Бостон хотод өчигдөр болсон дэлбэрэлтийн талаар АНУ-ын Холбооны мөрдөх товчоо нэлээд зүйлийг тодруулаад байна. Бөмбөг, тэсрэх бодис хийж байсан цүнхнийх болов уу гэмээр хар өнгийн нийлэг эдийн тасархай яг дэлбэрэлт болсон газраас олсон байна. Харин тэсрэх бодисыг түргэн буцалгагчид хийсэн байсан бололтой. Хэргийн газраас бас хадаасны үлдэгдэл олдсон байна. “Нэг хүн байсан уу, хэд хэдэн хүн байсан уу гэдгийг одоохондоо бид нарийн хэлж чадахгүй байна” гэж Холбооны мөрдөх товчооны төлөөлөгч Ричард Делорьер хэлжээ.
Холбооны мөрдөх товчоо Бостоны иргэдэд хандаж үйл явдлын үеэр авсан гэрэл зураг, дүрс бичлэг өгч туслахыг гуйгаад байгаа юм.
Олон улсын марафон гүйлтийн тэмцээний яг барианы газарт дэлбэрсэн хоёр ч удаагийн бөмбөгний уршгаар шархдаж гэмтсэн хүний тоо 183 болж тэдний 23 нь хүнд байгаа юм. Гурван хүн амь алдсаны нэг нь найман настай хүү байгаа бол нөгөө нь 29 настай эмэгтэй, хоёулаа АНУ-ын иргэн. Харин нэг эрэгтэй нь АНУ-д суралцдаг хятадын иргэн байжээ.
