Сүүлийн нэг хоногийн дотор шувууны томууны H7N9 вирусын халдвар авч өвчилсөн 60 шинэ тохиолдол бүртгэгдсэн тухай Хятадын хэвлэл мэдээллийн хэрэгслүүд мэдээлж байна. H7N9 вирусээр нас барсан хүмүүсийн тоо ч хоёроор нэмэгдэн нийт 13 хүн болжээ.
Өвчилсөн тохиолдол Шанхайд хамгийн ихээр бүртгэгдсэн бөгөөд 24 хүн өвдсөнөөс ес нь өөд болсон аж. Мөн Шанхайтай ойролцоо байдаг Зянсу, Жэзян, Аньхой мужид өвчлөл бүртгэгдсэн. Үүний дээр Бээжинд энэ вирусээр өвдсөн анхны тохиолдол бүртгэгдсэн нь нэлээд түгшүүр төрүүлж байгаа юм. Шувуу худалддаг байсан айлын охин H7N9 вирусын халдвар авсан гэдгийг албан ёсоор тогтоосон байна. Охины биеийн байдал тогтворжиж байгаа ч эцэг, эхийнх нь бие муудан эмнэлэгт хүргэгджээ.