Украины улс төр олон нийтийн бүртгэлгүй FEMEN хөдөлгөөний хагас нүцгэн бүсгүйчүүд германы Ганноверт үйлдвэрлэлийн яармаг үзэж явсан ОХУ-ын ерөнхийлөгч Владимир Путин, германы канцлер Ангела Меркель нар луу дайрсан байна. 
Путин, Меркель нарыг Volkswagen фирмийн асартай танилцаж байхад цээж нүцгэн бүсгүйчүүд сэтгүүлчдийн нүдэн дээр англи хэл дээр бүдүүлэг уриа лоозон хашгиран дайрчээ. Нэг бүсгүйн нуруун дээр бүр “Путин.....руугаа тонил” гэсэн бичиг байсан бол нөгөөгийн нь цээжин дээр “Дарангуйлагч” гэсэн бичиг байж. 
Хамгаалалтынхан бүсгүйчүүдийг саатуулсан ч тэд уриа лоозонгоо хашгирсаар байсан байна. Путин, Меркель хоёр ч тэднийг нэг их анхаарсангүй дараагийн танхим руу орсон байна. Гэхдээ гэрэл зураг дээр Путин, Меркель нар их тэвдэж цочирдсон төрхтэй гарчээ. 
Дараа нь хоёр удирдагч сэтгүүлчидтэй уулзахдаа Путин “Улс төрийн асуудлаар хувцастайгаа ярих нь илүү л дээ” гэсэн байна. Тэр бас “хамгаалалтынхан их хатуу хандсан болохоор тэд юу шаардаад, юу хашгираад байгааг би сайн сонсоогүй. Бүсгүйчүүдтэй тэгэж харьцаж болохгүй л дээ. Энэ нь надад буруу санагдсан. Тэдэнтэй зөөлөн харьцах ёстой” гээд “Энэ эсэргүүцэл надад таалагдсан” гэжээ.
