Улсын Дээд шүүхийн хяналтын шатны эрүүгийн хэргийн шүүх хуралдаанаар өчигдөр Т.Гансүх, Я.Лхагва, Н.Жамсран, Ш.Чинбат, Я.Баттогтох нарт холбогдох хэргийг хэлэлцэж, анхан болон давж заалдах шатны шүүхээс оноосон торгох ялыг хэвээр үлдээх шийдвэр гаргалаа.

Т.Гансүх, Я.Лхагва, Н.Жамсран нар өнгөрсөн онд болсон УИХ-ын сонгуулийн үеэр Увс аймгийн Тариалан сумын Бургастай багийн нэр бүхий найман иргэнд “Нэр дэвшигч Б.Чойжилсүрэн, Ч.Хүрэлбаатар нарыг дэмжээрэй. Тэдний төлөө саналаа өгөөрэй” гэж түрээсийн гэрээ хийх байдлаар тус бүрт нь 100 мянган төгрөг тараасан гэж анхан болон давж заалдах шатны шүүх буруутгасан. Ингээд тэдэнд хөдөлмөрийн хөлсний доод хэмжээг 90 дахин нэмэгдүүлсэнтэй тэнцэх хэмжээний буюу 12 сая 636 мянган төгрөгөөр торгох ял оноосон юм. Харин Ш.Чинбат, Я.Баттогтох нар УИХ-ын сонгуулийн үеэр Увс аймагт МАН-аас нэр дэвшигч Б.Чойжилсүрэн, Ч.Хүрэлбаатар нарын сонгуулийн сурталчилгаанд ажиллах явцдаа тус аймгийн Өмнөговь суманд нэр бүхий есөн оюутанд гэр түрээслэх хуурамч гэрээ байгуулж, тус бүрт нь 150,000 төгрөг өгсөн хэрэгт холбогдсон билээ. Тиймээс өмнөх хоёр шатны шүүх тэднийг ч хөдөлмөрийн хөлсний доод хэмжээг 90 дахин нэмэгдүүлсэнтэй тэнцэх хэмжээний мөнгөөр торгох ялаар шийтгэсэн юм.