МАХН-МҮАН-ын “Шударга ёс” эвслийнхэн баруун бүсийг зорилоо. Тэд “Шударга ёсны аян-2013”-ын хүрээнд баруун бүсийн хуралдайгаа Ховд аймагт хийхээр болсон байна. Энэ хуралдайд Шадар сайд Д.Тэрбишдагва, УИХ-ын дэд дарга Л.Цог, УИХ-ын гишүүн, Сангийн сайд Ч.Улаан, УИХ-ын гишүүн, Байнгын хорооны дарга Ц.Цолмон, Эрүүл мэндийн сайд Н.Удвал болон МАХН-ын Ерөнхий нарийн бичгийн дарга Г.Шийлэгдамба, нарийн бичгийн дарга Ч.Чимидсүрэн, П.Ангараг, О.Лхагвацэдэн нар оролцохоор өчигдөр нийслэлээс мордлоо.
Өмнө нь говийн болон зүүн бүсэд хуралдайгаа зохион байгуулсан. Говийн бүсийн хуралдайгаас баялгийнхаа эзэн бус барлаг нь болчихоод байгаа ард түмнийхээ санаа бодлыг хуваалцаж, гарах гарц, авралын замыг хамтдаа хайж, тодорхой шийдвэрт хүрсэн бол зүүн бүсийн хуралдайгаар хязгаар нутгийн иргэдийн өмнө тулгамдаж буй олон арван асуудлыг хэлэлцжээ.
Ховд аймагт болох тус хуралдайд Увс, Завхан, Баян-Өлгий, Говь-Алтай аймгийн иргэд хөдөлмөрчид оролцох юм байна.
