“Чингис хаан” нэр, “Чингис хааны албан ёсны хөрөг”-ийг хэрэглэх, ашиглах журмын тухай хуулийн төслийг УИХ-ын гишүүн Д.Ганбат, Г.Баярсайхан нар УИХ-ын дэд дарга Л.Цогод өчигдөр өргөн барилаа.
“Чингис хаан” нэр, “Чингис хаан хөрөг”-ийг хэрэглэх, ашиглах боломж нээлттэй байгаа бөгөөд уг нэр, хөрөг бэлгэдлийг ашигласан бараа бүтээгдэхүүний сав, баглаа, боодол өнөөдөр гудамжинд, хог дээр хэвтэж байгаа нь бид үндэстнийхээ бахархлыг үл хүндэтгэсэн явдал болж байгаагаас гадна “Чингис хаан” хэмээх энэ түүхэн хүний нэр хүндийг ч гутаан доромжилж байна гэж УИХ-ын гишүүд үзэж байна.
Тиймээс Монгол үндэстний бахархал болсон “Чингис хаан” нэр, “Чингис хааны хөрөг”-ийг хэрэглэх, ашиглахад хүндэтгэлтэй хандах, хэрэглэх, ашиглах хүрээ хязгаарыг тогтоох, жинхэнэ утгаар нь Монгол үндэстний бахархал байлгах эрх зүйн зохицуулалтыг бий болгох зорилгоор хуулийн төсөл санаачилсэн гэнэ.