МИАТ компанийн Берлин-Москва-Улаанбаатар чиглэлийн 2013 оны гуравдугаар сарын 24-ний өдрийн ОМ136 аяллын  “Боинг 737-800” онгоц  цасан шуурга болон хуваарьт бус техник үйлчилгээний улмаас Москвад саатаад буй билээ. Уг нь энэ онгоц Москвагийн цагаар 20:50 цагаар хөөрөх хуваарьтай байв.
Москва хот дахь МИАТ компанийн төлөөлөгчийн газар уг нислэгийн аюулгүй байдал, аюулгүй ажиллагаа, зорчигчдын тав тухыг хангахын тулд зохих дүрэм журмын дагуу шаардлагатай бүх арга хэмжээг авч байна. Уг онгоцны  120 зорчигчийн 95 нь Берлинээс, 25 нь Москвагаас бүртгүүлсэн аж.
Москва хотын “Шереметьево” олон улсын нисэх буудалаас  нисэхийн өмнөх  техникийн үзлэг хийх үед нэг дугуйг солих шаардлагатай болсныг  тогтоосон юм. Ингээд  Улаанбаатараас онгоцны нөөц дугуйг 25-ны өдрийн Аэрофлотын онгоцоор илгээжээ. Гэвч ОХУ-ын  гаалийн дүрэм журам, үйл ажиллагаанаас үүдэн дугуйг гаалийн агуулахаас авч чадалгүй өнөөг хүрсэн байна.
Энэ байдлаас шалтгаалан дугуй солих ажил нэлээн удах нь тодорхой болжээ. Иймд   “Шереметьево”  олон улсын нисэх буудалд байгаа зорчигчдыг Улаанбаатараас  тусгай онгоц явуулж авчрахаар болжээ. Энэ онгоц маргааш өглөө 9 цаг 15 минутад буух аж.