Цэвэр хэмээн хэрэглэгч­дээ “молигодсон” сүү сүүн бүтээгдэхүүн, жүүс үйлд­вэрлэгчид өнгөрсөн арван­нэгдүгээр сарын 1-нээс эхлэн шошгон дээр “залруулга”-тайгаар бүтээгдэхүүнээ худал­даанд гаргахаар болсон. ШӨХТГ-аас өгсөн эл даалгавар амьдралд хэрхэн хэрэгжиж байгааг сурвалжлахаар 15 дугаар хороолол дахь “Ми­ний дэлгүүр”-ээр орлоо. Хүнс­ний тасагт нь сүү, сүүн бүтээгдэхүүн төрөл бү­рээрээ өрөөстэй. Үндэсний үйлд­вэрлэгч болох “Сүү” ХХК-ийн “Шинэ” сүүний шошгыг хар­вал монгол үнээний сүүгээр найруулсан цэвэр сүү гэжээ. “Өглөө“ сүүний хувьд монгол үнээний хатаамал сүүгээр най­руулсан хэмээн бичсэн байсан бол импортын  сүүнүүд тухайн үйлдвэрлэсэн орныхоо хэл дээр тайлбартайгаар худал­даалагдаж байв. Сүү хэ­зээ ирснийг худалдагчаас нь асуухад “Өчигдөр өглөө  ир­сэн сүү. Одоо дуусч байна. Хайр­цагтай сүүний хадгалах ху­гацаа 14-21 хоног байдаг юм” хэмээв.
Ингээд тус тасгаар үйлч­­лүүлж байгаа зарим худалдан авагчтай уулзахад Эрдэнэчимэг хэмээх бүсгүй “Би өдөр бүр энэ дэлгүүрээр үйлчлүүлдэг. Өмнө нь, сүүний гаднах хайрцагны хаяг шошгыг уншдаггүй байсан. ШӨХТГ-аас сүү үйлдвэрлэгчдэд шаард­лага хүргүүлсэн гэсэн мэ­дээлэл гарснаас хойш уншдаг болсон. Гэхдээ үйлдвэрлэгчид шаардлагыг бүрэн хэрэг­жүүлэхгүй байна. Яахав, зарим нэг нь хаяг шошгон дээрээ өөрчлөлт оруулсан байна лээ” хэмээн ярьсан юм.
Үүний дараа 11 дүгээр хо­рооллын “Миний дэлгүүр”, “Но­мин супермаркет”-аар ор­­лоо. Хүнсний тасагт мөн л төрөл бүрийн савлагаа, хайр­цагтай сүүнүүд өрөөстэй харагдана. Тэдний дундаас “Мил­ко” сүүг харвал мөн л монгол үнээний сүүгээр най­руулсан гэжээ. Харин шүүсний хувьд “Гоё”  шүүс сэргээсэн хэмээн бичих ёстой ч тийм бичиг харагдсангүй. Уг нь, Монгол Улсад хүчин төгөлдөр мөрдөгдөж буй стандартаар шүүсийг цэвэр, өтгөрүүлсэн, сэргээсэн гэж гурав ангилдаг байна. Гэтэл дий­лэнх үйлдвэрлэгчид шүү­сээ “цэвэр жимсний” гэж сур­талчилдаг. Цэвэр шүүс гэдэг нь шинэхэн жимс жимсгэнэ, ногооноос механик аргаар боловсруулалт хийж гаргаж авсныг нэрлэдэг байна. Ха­рин сэргээсэн нь хуурай болон шахсан шүүсийг ундны устай холин технологийн боловсруулалтад оруулан гаргаж авсныг хэлдэг ажээ. Гаалийн мэдүүлгээр манай улсад никтар буюу жимсний сироп орж ирдэг гэсэн байдаг. Тэгэхээр дотоодын үйлдвэрлэгч компаниуд “сэргээсэн шүүс” гэж нэрлэх ёстой. Учир нь, шүүс үйлдвэрлэгчид жимс биш никтар буюу сироп оруулж ирдэг гэсэн үг. Шаардлага тавьснаас хойш дөрвөн сарын нүүр үзэж буй ч ямар хяналт тавьж буйг ШӨХТГ-ын хэвлэл мэдээллийн ажилтан Б.Төвшөөгөөс тодруулахад “Сүү үйлдвэрлэгчид манай тавьсан шаардлагыг биелүүлсэн. Харин “Мон Фрэш”, “АПУ” ХХК-иуд биелүүлэхгүй байсан учраас арван сая төгрөгөөр торгуулсан. Одоо худалдаанд гарч байгаа сүүнүүд манайхаас тавьсан шаардлагын дагуу хаяг шошго дээрээ найрлага, орцоо нарийн мэдээлж тавьдаг болсон. Харин шүүсний хувьд аж ахуйн нэгжүүд гадаадаас их хэмжээгээр хайрцаг, саваа захиалсан байдаг тул нөөцөлснийг нь устгах аргагүй. Энэ нь нэг талаараа үндэсний үйлдвэрлэгчдээ дарамталсан болчихно. Тэгээд ч манайд энэ талаар гомдол ирээгүй. Гомдол ирвэл бид барагдуулдаг” хэмээн ярьсан юм.
Харин “Витафит” ХХК-ийн Чанарын албаны дарга Б.Дэлгэрмаа энэ талаар “ШӨХТГ-аас өгсөн шаардлагын дагуу манай үйлдвэр шошгон дээрээ нэмэлт мэдээллээ оруу­лаад явж байна. Ин­гэх­дээ бүтээгдэхүүний анги­­лал, зип кодыг бичиж бай­гаа. Гэхдээ өмнө нь хайрц­гаа маш их хэмжээгээр за­хиалан бүтээгдэхүүнээ үйлдвэр­лэдэг болохоор хуучин шошго­тойгоороо зарагдаж байгаа нь цөөнгүй бий ” гэв. Гэхдээ үйлд­вэрлэгчдийн хэлж буй­гаар шинэ стандартыг хэрэг­жүүлэхдээ Стандартчлал хэм­жил зүйн газраас хэдхэн хоно­гийн дотор мөрдөх хуга­цаа өгдөг. Их хэмжээгээр бүтээгдэхүүнийхээ шошго нөө­цөлсөн болохоор алдагдал хүлээхээс гадна бүх компани зэрэг мөрдөхгүй болохоор тухайн бүтээгдэхүүний борлуу­лалт мууддаг сул тал байдаг гэдгийг хэлж байсан.
Харин ШӨХТГ-ын дарга О.Магнай хэлэхдээ “Аж ахуйн нэгжүүд шаардлага хэрэгжүүлэхгүй бол бүх дэлгүүр супермаркетаас бараа бүтээгдэхүүнийг татна. Хууль, стандартаа мөрдөхгүй бол хуулийн дагуу арга хэмжээ авна. Бид торгож шийтгэхдээ биш хууль дүрмээ мөрддөг болъё гэдэгт байгаа” хэмээж байсан. Ямар ч байсан өнгөр­сөн оны зургадугаар сард гарч арваннэгдүгээр сараас хэрэг­жиж эхэлсэн шаардлага бүрэн биелэлээ олоогүй  л байна.