Тус дүүргийн Иргэдийн төлөөлөгчдийн ээлжит хурлаар Засаг даргын 2013-2016 оны мөрийн хөтөлбөр, 2013 оны нийгэм, эдийн засгийн зорилтыг хэлэлцэн баталлаа. Иргэдийн хурлын төлөөлөгчид энэ удаагийн Засаг даргын мөрийн хөтөлбөрийг иргэдэд чиглэсэн, тэдний оролцоог дэмжсэн хэмээн онцолсон юм. Баянгол дүүргийн Засаг дарга, НИТХ-ын төлөөлөгч Д.Оросоо мөрийн хөтөлбөр, 2013 оны зорилтыг дүүргийн ИТХ-аар батлагдсантай холбогдуулан шинэчлэлийг хамтдаа хийхийг олон нийтэд уриаллаа. 2016 онд үр дүнгээ тайлагнах энэхүү мөрийн хөтөлбөрийг “Аюулгүй амгалан Баянгол”, “Ажилтай орлоготой Баянгол”, “Амины орон сууцтай Баянгол”, “Агаар нь цэвэр Баянгол”, “Авлигагүй Баянгол” хэмээх таван үндсэн бүлэгт ангилан 69 багц ажил хийхээр төлөвлөлөө. Ингээд Засаг даргын Тамгын газрын найман хэлтэс, алба, харьяа 22 байгууллагатай хамтран хэрэгжүүлэхээр 231 үйл ажиллагааг төлөвлөжээ.
Заримаас нь дурдвал Баянгол дүүргийн гэр хорооллын тодорхой цэгүүдэд иргэдийн оролцоотойгоор дахин төлөвлөлт хийж, орчин үеийн тохилог амины болон нийтийн орон сууц барих ажлыг иргэдийн оролцоотой эхлүүлэхээр заажээ. Мөн дүүрэгт хийж буй хөрөнгө оруулалтыг ил тод болгох, санхүүгийн үйл ажиллагаанд иргэдийн хяналтын бүтцийг бий болгох гэх мэтээр авлигаас ангижрах заалтуудыг тусгасан байна.