Монголын Залуучуудын Холбооноос санаачилан өнгөрсөн оны 04-р сараас эхлэн авлигын эсрэг өрнүүлсэн “Авлига би авахгүй, би өгөхгүй” аян энэ жил үргэжлүүлэн идэвхтэй өрнөх нь ээ. НЗДТГ, Гаалийн ерөнхий газар, Нийслэлийн газрын алба, УБЕГ, МХЕГ зэрэг төрийн томоохон байгууллагуудыг нэгтгэж, “Залуучуудын үнэн” сонинд авлигагүй тоолуурт 7000 гаруй дэмжигчид нэмэгдэж, түүнчлэн фэйсбүүк цахим ертөнцийн хүрээнд хүчтэй өрнөөд байгаа энэхүү аянд залуус дуу хоолойгоо хүргэж идэвхтэй хамрагдсаар байгаа билээ. Саяхан “Транспэрэнси интернэшнл” (Даян дэлхийн авлигын эсрэг хөдөлгөөн) олон улсын байгууллагын Зүүн өмнөд Азийн төслийн ахлах зохицуулагч Ран Лиао Монголд айлчлахдаа авлигын эсрэг аяныг идэвхтэй өрнүүлж буй МЗХ-оор айлчилж, МЗХ-ны ерөнхийлөгч А.Мөнхбаттай уулзан, тэдний хэрэгжүүлсэн ажилтай танилцаад цаашид албан ёсоор хамтран ажиллахаар болсон гэнэ. Тэгвэл энэ 2013 онд МЗХ-ныхон АТГ-тай хамтран авлигын эсрэг залуус хамтдаа уриатай “Авлига би авахгүй, би өгөхгүй” аяныг хөдөө орон нутгуудаар аялуулахаар болжээ. МЗХ-ныхон авлигын эсрэг энэ аяны хамрах хүрээг өргөтгөх, хөдөө орон нутгийн залуучуудад авлигын хор уршгийн талаар мэдээлэл сурталчилгаа хүргэх зорилгоор 300 гаруй сумаар тойрон аялаж, сумын ЗДТГ, сургууль, эмнэлэг, цагдаа болон бусад төрийн байгууллагуудыг авлигагүй дэвтэрт нэгтгэж, гарын үсэг зурах, орон нутгийн залуучуудтай уулзалт ярилцлага, сургалт зохион байгуулах зэрэг ажлуудыг хийхээр төлөвлөж байгаа гэнэ. Мөн цаашдаа энэхүү аянд төрийн болон төрийн бус хувийн хэвшлийн байгууллагууд, их дээд сургуулиудыг нэгтгэх, авлигын эсрэг залуучуудаа уриалсан олон ажлуудыг ч хийхээр ажлын төлөвлөгөөндөө тусгажээ.