Нийслэлийн агаарын бохирдлыг бууруулах талаар багагүй хөрөнгө зарж, хэдэн засгийн газар дамжин ярьсаар байгаа ч Улаанбаатар хотын агаар бохир хэвээрээ л байна. Энэ оны нэгдүгээр сарын байдлаар азотын давхар ислийн хоногийн дундаж агууламж Баруун дөрвөн замын орчимд 31 удаа, 13-р хороолол орчимд 30 удаа, Хархорин захын орчимд 28 удаа, 32-ын тойрог орчимд 26 удаа, Офицеруудын ордон орчимд 22 удаа, 1-р хороолол орчимд 15 удаа зөвшөрөгдөх хэмжээнээс давсан байна. Харин хүхэрлэг хийн хоногийн дундаж агууламж 32-ын тойрог орчимд 31 удаа, Баруун дөрвөн зам, 13-р хороолол орчимд тус бүр 30 удаа, Хархорин захын орчимд 29 удаа, Офицеруудын ордон орчимд 25 удаа, 1-р хороолол орчимд 20 удаа хүлцэх хэмжээнээс давжээ. Нүүрстөрөгчийн дутуу ислийн агууламж 32-ын тойрог орчимд 2 удаа, Баруун дөрвөн замын орчимд 1 удаа, 10 микроноос бага хэмжээтэй тоосны агууламж Баруун дөрвөн зам, 32-ын тойрог орчимд тус бүр 30 удаа, 13-р хороолол, Хархорин захын орчимд тус бүр 29 удаа, 2.5 микроноос бага хэмжээтэй тоосны агууламж Баруун дөрвөн замын орчимд 25 удаа агаарын чанарын стандарт дахь хүлцэх хэм хэмжээнээс давсан байна.
