Сар шинийн баяр ойртож томоохон худалдааны төв, ялангуяа “Нарантуул” захаар үйлчлүүлэгчдийн тоо нэмэгдэж байгаатай холбогдуулан энэ орчмын авто замын түгжрэлийг бууруулах , үйлчилгээний ажлыг хөнгөн шуурхай болгох үүднээс хэд хэдэн арга хэмжээ авах болсноо өнөөдөр холбогдох байгууллагын хүмүүс мэдээллээ. ЗЦГ-ын дэд дарга Жаргалсайхан, Улаанбаатар хотын ерөнхий менежер Бадрал, Нийтийн тээврийн газрын дарга Энхбат нар өнөөдөр “Нарантуул” захад очиж энэ талаар мэдээлэл хийсэн юм. Нисэх, Яармаг, Баянхошуу, Толгойт, Их наран зэрэг нийслэлийн алслагдсан хорооллуудаас Нарантуул зах руу нийтдээ 32 буухиа автобус явуулж эхэлж байна. Энэ автобусууд захын хорооллын эцсийн буудлаас тэгш цагуудад хөдөлж сондгой цагуудад Нарантуул захаас хөдөлж байх юм.
Мөн Нарантуул захын хашааны ард ХӨСҮТ рүү гардаг хашааны хагархай буюу явган хүн гардаг “Мангасын ам” гэдэг нүхийг авто машины гарц хаалга болгох юм байна. Ингэснээр өмнө хаалган дээрх авто машины түгжрэл тодорхой хэмжээгээр багасна гэж үзэж байгаа юм байна.
