Хан-Уул дүүргийн шүүх өнөөдөр 09:00 цагаас УИХ-ын гишүүн асан Ц.Шинэбаярт холбогдох хэргийг хэлэлцэхээр товложээ. Түүнийг өнгөрсөн жилийн дөрөвдүгээр сард МАХН-ын дарга, Ерөнхийлөгч асан Н.Энхбаярыг баривчлах үеэр цагдаагийн ажилтны өмнөөс эсэргүүцэл үзүүлж, биед нь халдсан хэл амаар доромжилсон, салаавч үзүүлж, ёс зүйгүй авирласан гэж эрүүгийн хэрэг үүсгэсэн билээ. Тиймээс УИХ-ын гишүүн асан Ц.Шинэбаяртай холбогдож дараахь зүйлийг тодрууллаа.

-Танд холбогдох хэргийг маргааш шүүхээр тов гаргасан байна. Та яллах дүгнэлттэй танилцсан уу?
-Шүүх хурал болох эсэх талаар мэдээгүй л байна. Чамаас л сонсож байна. Яллах дүгнэлт ч өгөөгүй. Ер нь, шүүх, прокурорын байгууллага өдөр ажлаа амжуулж чаддаггүй юм биш үү. Ажлын цаг дууссан дараа, эсвэл шөнө дөлөөр яллах дүгнэлтээ авчирч өгөх юм байлгүй. Монголын шоронгийн хоригдлуудын тоо дутаж байгаа бол би очиж бөглөе дөө.

-Өмгөөлөгчтэйгөө уулзсан уу?
-Уулзаагүй. Ажил ихтэй завгүй явна. Өнөөдөр амжиж уулзана даа. Баяржаргал өмгөөлөгчөөр өмгөөлүүлж байгаа.