Венесуэлийн Ерөнхийлөгчөөр сонгогдоод байгаа Уго Чавесын тангараг өргөх ёслолыг уг нь өнөөдөр хийхээр төлөвлөсөн байсан ч бие нь чилээрхэж Кубад эмчлүүлж байгаагаас болоод тодорхойгүй хугацаагаар хойшлуулсан. Венесуэлийн дээд шүүхийн мэдэгдэж байгаагаар заавал тангараг өргөхгүйгээр үүрэгт ажлаа үргэлжлүүлэн хийж болох гэнэ. “Чавесын хувьд тангараг өргөх нь хэлбэрийн төдий зүйл. Ерөнхийлөгчийн үүрэгт ажлаа хийж байсан болохоор одоо үргэлжлүүлээд ажиллаж болно. Ер нь тангараг өргөх ёслол хэзээ болохыг бид одоо хэлж мэдэхгүй байна” гэж Венесуэлийн Дээд шүүхийн дарга Луис Эстел Моралес лхагва гарагт мэдэгдсэн байна. Уго Чавес хорт хавдрын улмаас мэс засал хийлгээд одоо Кубад эмчлүүлж байгаа юм.