Дэлхийн тэргүүн баян 100 тэрбумтны жагсаалтыг “Bloomberg”-ээс “Тэрбумтнуудын индекс” нэртэйгээр гаргажээ. Энэхүү жагсаалтаас харвал дэлхийн баячууд 2012 онд хөрөнгө бэлээ улам зузаалж авчээ.
Тухайлбал дэлхийн хамгийн баян хүнээр дахин тодроод байгаа Мексикийн бизнесмэн, хөрөнгө оруулагч Карлос Слимийн хөрөнгө 13,4 тэрбум ам.доллар буюу 21,6 хувиар өсч 72,5 тэрбум ам.долларт хүрээд байна. Тэгвэл дэлхийн тэргүүн баян гэсэн байр суурийг олон жил алдалгүй хадгалж ирсэн “Microsoft” компанийн эзэн Билл Гейтс 12,6 хувиар хөрөнгөө ахиулж 62,7 тэрбум ам.долларт хүргэжээ.  Харин сайн санааны үйлсэд бүх хөрөнгийнхөө 98 хувийг зарцуулна гэж зарлаад байгаа хөрөнгө оруулагч Уоррен Баффетын хувьд эд хөрөнгөө 12 хувиар арвижуулж, 47 тэрбум ам.долларын эзэн болжээ. Гэхдээ энэ бол тэрбумтнуудын олсон хамгийн өндөр ашиг орлого хараахан биш. Испанийн тэрбумтан Амансио Ортегагийн хувьд 2012 он мөнгөний хур буусан жил болж, бүхэл бүтэн 22,2 тэрбум ам.доллараар хөрөнгөө нэмэгдүүлж чадсан байна. А.Ортега бол дэлхийн хамгийн олон хүнд хүрсэн түгээмэл брэнд гэгддэг“Zara” -г эзэмшигч “Inditex” компанийн эзэн юм.  Тэгвэл тавилгын худалдаагаар дэлхийд тэргүүлэгч “IKEA”-гийн 86 настай эзэн Ингвар Кампрадын хөрөнгө 16,6 хувиар өсч 42,9 тэрбум ам.долларт хүрснээр тэрбумтнуудын жагсаалтын тавдугаарт бичигджээ.
Азийн хамгийн баян хүн Ли Ка Шиний хувьд өнгөрсөн жил 6,4 тэрбум ам.долларыг өөрийн болгож, хөрөнгө нь 28,6 тэрбум ам.долларт хүрсэн байна.
Дэлхийн тэргүүн баячуудын хөрөнгө ийн өссөн байхад мөнгөө алдсан тэрбумтнууд ч байна. Тухайлбал, “Facebook”-ийг үндэслэгч Марк Зукерберг өнгөрсөн оны хувьцааны алдагдлын улмаас 5,2 тэрбум ам.доллар алдсан хэмээн эдийн засгийн шинжээчид үзжээ. Одоо түүний хөрөнгө 12,3 тэрбум ам.доллараар хэмжигдэж байна.
Дэлхийн нийт тэрбумтнуудын хөрөнгө 2012 онд 241 тэрбум ам.доллараар нэмэгдэж, 1,9 их наядад хүрээд байгаа аж.