Кот-д’ Ивуарын нийслэл Абижаны цэнгэлдэх хүрээлэнд шинэ жилийн баяр тэмдэглэж ёслолын буудлага үйлдэх үеэр эмх замбараагүй байдал үүсч 61 хүн амь үрэгдэж 49 хүн бэртэж гэмтжээ. Амь үрэгдсэн хүмүүсийн дунд 8-15 насны олон хүүхэд байгаа юм байна. Хэргийн учир шалтгааныг хараахан тогтоож чадаагүй байгаа ч ёслолын буудлага үзэж цэнгэхээр цугларсан 50 мянган хүнээс нэг хэсэг нь гарахаар цэнгэлдэх хүрээлэнгийн хаалга руу хуйлрах үеэр орох гэсэн хүмүүс мөргөлдөж хүмүүс дарагдсан бололтой. Зарим гэрчийн мэдүүлж байгаагаар өсвөр насныхан гар утас эд зүйл хулгайлахаар хүйтэн зэвсэг ашиглаж хүмүүсийг сандралд оруулсан гэж байна.
Үүнээс үүдээд тус улсад гурав хоногийн гашуудал зарлаж, баяр ёслолын арга хэмжээнүүдийг хориглосон байна.