АНУ-ын Ерөнхийлөгч Б.Обамагийн гэр бүл уламжлал ёсоор зул сараа Хавайд тэмдэглэхээр ирээд байна. Ерөнхийлөгчийн төрсөн нутаг болох Хавайн аралд орших Оаху арлын Кайлуа хэмээх далайн эрэг дэх байшиндаа тэд зул сараа өнгөрүүлэх ажээ. Тэд өчигдөр орой өвлийн жихүүн уур амьсгалтай Вашингтоныг орхиж, нарлаг Хавайд иржээ.

Ерөнхийлөгчийн гэр бүлтэй хамт Цагаан ордны тогооч, туслах ажилтнуд болон Б.Обамагийн эртний найзууд Хавайд ирээд байгаа гэнэ. Ерөнхийлөгч дотны найзуудтайгаа баярын өдрүүдийг гольф тоглож өнгөрүүлэхээр төлөвлөжээ. Ерөнхийлөгч, тэргүүн хатагтай баярын өдрүүдэд Цагаан ордонд эзгүй байх учир ард түмэндээ хандсан зул сарын баярын мэндчилгээгээ урьдчилан бичүүлээд явсан байна.