Ерөнхий сайдын ахлах зөвлөх А.Гансүхээс дараахь тодруулгыг авлаа.

-Олборлох үйлд­вэр­лэлийн ил тод байдлын судалгаанд 200 орчим компанийг хамруулсан гэлээ. За­рим компани Монгол Улсад татвар төл­дөггүй, тайлан тоо­цоо­гоо гаргаж өгдөг­гүй гэх мэт зөрчил дутагдал гаргадаг тухай шүүмжлэх хүн олон байгаа. Тиймээс ийм компаниудад Засгийн газар ямар хариуцлага тооцдог юм бэ?

-Өмнө нь хариуцлага тооцох асуудал их бүрхэг байсан. Бид 10 дугаар хуралдаанаараа хариуцлагын асуудлыг тодорхой болгосон. Ирэх оны нэгдүгээр сараас эхлэн тайлангаа дутуу, буруу гаргасан компаниудад хатуу хариуцлага тооцох болно. Холбогдох байгууллагуудад энэ чиглэлээр үүрэг, даалгавар өгсөн байгаа.

-Судалгаанд хамрагдсан компанийн хэдэн хувь нь гадаадын болон дотоодын хөрөнгө оруулалттай байгаа вэ?

-Хөрөнгө оруулалтыг нь гадаад, дотоод гэж зааглаагүй.

-Хариуцлагатай уул уурхайн найман шалгуур үзүүлэлт тавьдаг гэдэг. Хангаж ажилласан компани хэр олон байгаа бол?

-Найман шалгуур үзүүлэлтийг Засгийн газар хэрэгжүүлнэ. Ногоон экологийн баримжаатай болох гэж Байгаль орчны багц хуульд өөрчлөлт оруулсан шүү дээ. Байгальд ээлтэй уул уурхайг хөгжүүлэхийн тулд Ууул уурхайн яамыг тусад нь байгуулсан. Засгийн газрын авч явж байгаа үндсэн чиглэл. Бас найман зарчим бий. Нэг нь ил тод байдал. Үүнийг хэрэгжүүлж байгаа юм. Олборлох үйлдвэрлэлийн ил тод байдлын судалгааны нэгдсэн тайлан гаргах стандартыг дэлхийн 40 гаруй улсад хэрэгжүүлж байгаа.

-2010 онд ОҮИТБС-нд “Оюу толгой” компанийн 100 сая төгрөгийн орлого орхигдсон гэсэн. Энэ удаагийн тайланд ингэж орлого нь орхигдсон компани гарсан болов уу?

-Тухайн үеийн тайланд тийм алдаа гарсан. Энэ нь тайлангийн маягттай холбоотой байсан л даа. Маягтад урьдчилгаа төлбөр гэсэн зүйл байгаагүй. Тиймээс Сангийн яамныхан нэгэнт маягтад байгаагүй учир “Оюу толгой” компанийн тайланд тусгасан байсан 100 сая төгрөгийн урьдчилгаа төлбөрийг бичээгүй. Тэрнээс биш санаатайгаар худал бичиж, нуусан зүйл биш шүү. Өмнө нь энэ мэт алдаа гарсан учир маягтаа шинэчилсэн.

-Тайланд нь аудит хийх компаниа яаж сонгож байгаа юм бэ?

-Уул уурхайн чиглэлээр үйл ажиллагаа явуулдаг компаниудын жилийн орлогын төвшин тодорхойлдог. Тухайлбал, 40 тэрбумаас дээш орлоготой компаниудад аудит хийж байгаа. Энэ мэтээр босго тогтоож, компаниудаа эрэмбэлж, нэгдсэн тайлангаа гаргадаг.