Өнөөдөр Өмнөд Солонгост төрийнхөө 18 дахь тэргүүнийг сонгох Ерөнхийлөгчийн сонгууль эхэлж байна. Сонгуульд зургаан нэр дэвшигч өрсөлдөж байгаа ч гол өрсөлдөөн эрх баригч Сэнури намаас нэр дэвшигч 60 настай Пак Кын Хе болон сөрөг хүчний “Ардчилсан намын нэгдэл”-ээс нэр дэвшигч 59 настай Мун Жэ Ин нарын хооронд болно.
Энэ удаагийн сонгуулийн гол онцлог нь төрийн тэргүүний суудлын төлөө Солонгосын түүхнээ анх удаа эмэгтэй хүн өрсөлдөж байгаа явдал. Олон удаагийн санал асуулгаар хоёр өрсөлдөгчөөс Пак Кын Хегийн талд гурван хувийн давуу тал байгаа.
Сурталчилгааны явцад нэр дэвшигчид аль аль нь “Улс төрийн шинэ бодлого” гэдэгт тулгуурлаж байгаа ч хуучны улиг болсон харилцан бие биенээ гүтгэх, гутаан доромжлох явдал гарсаар байсан юм. Сонгуулийн дүн өнөөдөр шөнө дунд гарна.
