Хойд Солонгос пуужин харваж, хиймэл дагуул амжилттай хөөргөснөө тэмдэглэж, нийслэлийнхээ төв талбайд бөөнөөрөө жагсчээ.
Олон улсын хоригийг үл хэрэгсэн пуужин харвалаа хэмээн дэлхий нийтээр буруушааж байхад хойд солонгосчууд харин технологийн дэвшил, батлан хамгаалахын хүч чадлаа бахдан сайшааж, нийтээрээ парад жагсч байна.
Хойд Солонгосын харвасан урт тусгалын пуужин гурван шатлалтай байсан бөгөөд эхнийх нь Солонгосын хойгийн баруун хэсэгт унасан юм. Энэ унасан үлдэгдэл хэсгийгӨмнөд Солонгосын тал даруйхан байршлыг нь тогтоож, түүж аваад, шинжилж судлах ажилдаа ороод байна.
Хойд Солонгосын хувьд гурван шатлалт пуужин амжилттай хөөргөсөн анхны тохиолдол учир ийнхүү бүх нийтээрээ баярлан хөөрч буй юм. Уг баярын парадын үеэр Хойд Солонгосын Хөдөлмөрчний намын ерөнхий нарийн бичгийн дарга Ким Ки Нам үг хэлэхдээ “Ийнхүү хиймэл дагуул хөөргөсөн нь манай улсын эдийн засгийг сэргээн босгоход нэн чухал хэрэгтэй” хэмээн мэдэгджээ.