АНУ-Австралийн хамтарсан Эдийн засаг, энхтайвны институтээс терроризмын индекс гаргаж, улс орнуудыг жагсаажээ. 156 улс орныг хамарсан энэхүү судалгаагаар бол терроризмын аюул хамгийн ихтэй улс орноос эхлээд хамгийн бага хүртэл нь жагсаасан бөгөөд манай улс 116-д бичигджээ. Манайхтай хамт Хойд Солонгос, Оман зэрэг нэлээд хэдэн орон 116 дугаар байрыг хуваан эзэлжээ.
2001 оны есдүгээр сарын 11-ний халдлагаас хойш өнөөдрийг хүртэлх мэдээллийг хамруулсан энэ судалгаанаас харвал дэлхий дахиныг цочроосон уг халдлагаас хойш террорист халдлага гарах тохиолдол дөрөв дахин нэмэгдсэн нь харагджээ. Мэдээж, террорист халдлагуудын дийлэнх нь Ирак, Афганистан, Пакистан зэрэг дэлхийн халуун цэгүүдэд гарсан  байна. Тиймдээ ч дэлхийн терроризмын индексийн жагсаалтын эхний 5-д Ирак, Афганистан, Пакистан, Энэтхэг зэрэг улс бичигджээ. Эдгээр улс тус бүрт дэлхий дээр гарч буй нийт террорист халдлагын 10 гаруй хувь нь тохиолддог болохыг "Global Terrorism Index"-ийн судалгаа харуулсан байна.
Судалгаанд хамрагдсан 156 орны 39-д нь сүүлийн 11 жилийн хугацаанд нэг ч террорист халдлага гараагүй бөгөөд үүгээрээ манайхтай адил жагсаалтын хойгуур бичигдсэн ажээ.