Сүүлийн жилүүдэд уул уурхайн салбар манай улсын эдийн засагт голлох үүрэг гүйцэтгэх болсон. Ингээд Монгол Улсын нутаг дэвсгэрийн хэдэн хувьд нь уул уурхайн ажил өрнөж байгааг сонирхоё. Эдүгээ нийт нутгийн 0.5 хувь нь ашиглалтын, 13.2 хувьд нь хайгуулын лицензтэй гэсэн судалгаа бий.  Одоогийн байдлаар нүүрсний 54, төмрийн хүдрийн дөрөв, алтны 127, зэсийн таван лиценз байгаа аж. Өнөөдөр Баянгол, Төмөртэй, Төмөр толгой, Хуст уул, Таян нуур, Баргилтын төмрийн ордыг ашиглаж буй. Эдгээр ордоос өнгөрсөн онд 65 хувийн агуулгатай зургаан сая орчим тонн төмрийн хүдэр, баяжмал экспортолсон судалгаа бий. Энэ онд есөн сая тоннд хүрнэ гэсэн төлөвлөгөө гаргасан. Цаашдаа 2015 он гэхэд 13 сая тоннд хүрэх төлөвтэй байгаа аж. Энэ оны эхний арван сарын байдлаар алт олборлогчид Монголбанкинд 2.7 тонн алт тушаажээ. Мэргэжилтнүүд Тавт, Оюу толгой, Баян-Айраг зэрэг томоохон ордоо ашиглаад эхлэхээр ирэх жилээс алт, зэсийн олборлолт нэмэгдэнэ хэмээж буй.