Бангладешт оёдлын үйлдвэрт гарсан галын улмаас нас барсан хүний тоо 120-д хүрсэн байна. Бямба гарагийн орой Дакка хотын есөн давхар барилгын нэгдүгээр давхраас эхлэн гал гарч хэдхэн минутын дотор бүхэл байшинг хамарчээ. Гал доод давхраас эхэлсэн болохоор ажиллагсад бүгдээрээ галд хоригдож олонхи нь цонхоор үсэрч амь алдсан байна. Гал унтраагчид түймрийг ням гарагт л арай гэж унтраажээ.