АНУ-ын Ерөнхийлөгч Б.Обама дахин сонгогдсоноосоо хойш анхны хэвлэлийн бага хурлаа хийхдээ “Баячууд өндөр татвар төлөх ёстой” гэдэг байр сууриа дахин илтгэлээ. Өндөр орлоготой иргэдийн 250 мянган ам.долларын орлогоос эхлээд татвар ногдуулах тухай хуулийг нэн даруй батлах хэрэгтэй байгааг тэрээр мэдэгдээд энэ хууль дундаж орлоготой иргэдэд хамааралгүй болохыг ойлгуулжээ.
Ерөнхийлөгчийн энэ байр суурийг сөрөг хүчний Бүгд найрамдах намынхан эсэргүүцэж, баячуудын татварыг нэмэх ёсгүй хэмээн үзэж байгаа ч Б.Обама “Бид чинээлэг иргэдийнхээ татварыг нэмэх эсэхийг ярьж байж, дундаж давхаргынхандаа дайсагнасан бодлого явуулж бүр болохгүй” хэмээн мэдэгджээ.