Британийн Ерөнхий сайд Дэвид Камерун банкны салбарынхаа эрхэм ноёд, хатагтай нарт хэлэх үгээ хэтэрхий гүнзгий тунгаан бодоод, цамцных нь энгэр задгайрсныг ч мэдээгүй бололтой. Иймэрхүү байдалтай хэвлэлийн дуранд өртжээ. Тэрээр жил бүр болдог уламжлал болсон Лорд Мэрийн хүлээн авалтад оролцож буй нь энэ ажээ. Энэ удаа тэрээр банкны салбарынханд хандан үг хэлэхдээ улс орныхоо эдийн засгийг сэргээн босгоход банк,санхүүгийн салбар ямар чухал үүрэгтэй болохыг онцолсон байна. Тэрээр хэлсэн үгэндээ “Ямар салбар 50 сая хүний данс, 11 сая хүний моргейжийн зээлийг дааж, хэдэн зуун тэрбум фунт стерлингийн зээлийг жижиг дунд бизнес эрхлэгчдэд олгодог билээ. Ямар салбар хоёр сая хүнийг, бас Лондонгийн хүн амын гуравны хоёрыг ажлын байраар хангадаг билээ. Мэдээж, энэ банк санхүүгийн салбар шүү дээ. Тиймээс асуудалд орсон банкуудыг хог дээр гаргана гэдэг бол Британийг л хог дээр хаяна гэсэн үг” гэх мэтчилэн онцолсон байна. Эрхэм Ерөнхий сайдын хэлэх үг ийм чухал байсан учраас тархин дотроо үг бэлдээд цамц хавиар юу болоод байгааг анзаараагүй биз ээ. 
