Хятадын эрх баригчид Далай ламыг дахиад л шүүмжилж, Түвдийн талаар сануулга өгчээ. Тус улсын Гадаад хэргийн яамнаас мэдэгдэл гаргаж Түвдэд үе үе гарч буй тэмцлийн нэг хэлбэр болох зулын гол болж, өөрийгөө шатаах явдлыг Далай лам өөгшүүлэн дэмжиж байна хэмээн буруутгажээ. Өнгөрсөн оноос хойш Түвдэд 70 гаруй хүн Бээжингийн дэглэмийг эсэргүүцэн амьдаараа зулын гол болоод байгаа юм. Үүнийг Далай лам өөгшүүлэн, Түвдэд эмх замбараагүй байдал үүсгэхийг хичээж байна гэж Хятадын эрх баригчид үзэж байгаа бол Дээрхийн гэгээнтэн үүнд хариулт өгөхдөө “Тэд намайг буруутгахын оронд энэ бүх тэмцэл юунаас үүдэн гарч байгааг нухацтай бодох хэрэгтэй” гэжээ.
Далай лам сүүлийн хэдэн өдөр Японд айлчилж байгаа нь тус улстай газар нутгийн маргаантай байгаа Хятадын эрх баригчдын дургүйцлийг төрүүлсэн бололтой.