“Хүн хүнээ нэг муулаад, эсвэл зусардаж магтаад эхэлбэл үгүй мөн ч ална шүү” гэсэн яриа байдаг. Үүний хамгийн том жишээг авторитар дэглэмтэй улсууд харуулдаг. Туркмений ерөнхийлөгчийн хайртай хүлэгт зориулсан шүлгийн уралдаан зарлаж байсан гэхээр бидэнд итгэхэд бэрх. Тэгвэл казахчууд туркменүүдээс нэг их дута­хаар­гүй магтаалчид гэдгээ ха­руулжээ. Тэд Казахстаны анхны Ерөнхийлөгч Назар­баевийн намтрыг хэн сайн мэдэх вэ гэсэн блиц уралдаан Астана хотын сурагчдын дунд явуулахаар болсон байна. Казахстаны залуу удирдагчдыг тодруулах уралдааны шигшээд 10-11 дүгээр ангийн сурагчид ийм өвөрмөц уралдаанд оролцох болов. Энэ бол дөнгөж эхлэл. Уралдаан явуулах газар нь Анхны Ерөнхийлөгчийн музей. Тэм­цээн болох өдөр нь Анхны Ерөнхийлөгчийн баярын өдөр. 2011 оны сүүлээс Казахстан даяараа ийм шинэ баяр тэмдэглэдэг болсон юм.
Назарбаев нь Казахстаныг түүхэндээ анх удаа тусгаар улс болсон цагаас хойш Ерөнхийлөгчийн албыг хашиж байгаа бөгөөд өдгөө дөрөв дэх удаагаа сонгогддог үүрэгт ажлаа гүйцэтгэж байна. Хэдхэн жилийн өмнөөс түүнд ард түмний манлайлагч гэсэн шинэ статус болгож, зураг, хөрөг, намтрыг нь элдвээр гутаан доромжилбол эрүүгийн хариуцлага хүлээлгэдэг болсон юм.